It-Tnejn li għadda tħabbar
il-Budget għas-sena d-dieħla. Budget li mad-daqqa t’għajn ma jħabbar xejn
negattiv, iżda ftit li xejn pożittiv lanqas. Naħseb li żgur tista’ tgħid hu li
dan hu budget nieqes
mill-innovazzjoni, għax ftit li xejn rajna affarijiet ġodda li jistgħu
jinċentivaw setturi ġodda jew li jippjanaw għal Malta ta’ għada f’dawk li huma
l-aktar oqsma kruċjali: l-edukazzjoni, is-saħħa, l-akkomodazzjoni u t-trasport
tal-massa.
Ħa nibdew billi nħarsu
ftit lejn xi tħabbar dwar l-aktar problema li qed jaffaċċjaw il-Maltin
bħalissa, il-prezz tal-kera u tal-propjetà. Apparti l-white-paper li ġiet
pubblikata, fid-diskors tal-budget issemmew
diversi miżuri li huma ripetizzjoni ta’ miżuri li ħabbar il-Gvern stess f’budgets passati, jew ri-introduzzjoni
ta’ skemi li kien daħħal Gvern Nazzjonalista fil-passat u li dan il-Gvern kien
maqdar u saħansitra waqqaf.
Issemma s-sussidju fuq
il-kera fil-privat. Din kienet skema li issa ilha snin li ġiet introdotta. Vera
li żdied dan is-sussidju, iżda vera wkoll li kif kien stqarr il-Prim Ministru
stess is-sena l-oħra din ġieli wassal biex is-sidien reġgħu għollew il-kera.
Issemmiet l-iskema tal-kiri tal-Gvern mill-privat biex imbagħad jikrieh hu għal
akkomodazzjoni soċjali. Din kienet saret fil-passat u l-Partit Laburista tgħidx
kemm kien kritikaha u qal li kienet fallimenet. Milli jidher issa saret tajba u
ser jerġa’ jintroduċieha. Semma l-għajnuna għal nies li għandhom fuq l-erbgħin
u jridu jixtru proprjetà għax il-Bank ma jislifhomx minħabba li ma għandhomx ħafna snin fuq x’hiex
iħallsu s-self. Tajba. Iżda fejnha l-għajnuna għal koppji żgħar, li illum
għandhom problema kbira biex jixtru l-ewwel proprjetà għax ma jaslu qatt biex
iġemmgħu biżżejjed għall-ewwel 10%? Dan kollu minħabba l-isplużjoni
fl-immigrazzjoni ta’ barranin li qed iġibu lill-Malti out-priced f’pajjiżu. Problema li ħoloq il-Gvern stess u li għadu
ma għamel xejn biex jindirizzaha.
U x’ġara mill-akkomodazzjoni soċjali? Wiegħed b’tant pompa kien investiment
ta’ €50 miljun mill-fonda tal-iskema taċ-ċittadinanza! Meta ser jibda? Ilu
diġa’ sitt snin fil-Gvern u għadu ma beniex imqar appartament wieħed ta’
akkomodazzjoni soċjali. Rekord li qatt ma seħħ f’pajjiżna. Sadattant, il-kju
ta’ nies li għandhom bżonn akkomodazzjoni soċjali jkompli jiżdied. Bħalma qed
jiżdied in-numru ta’ nies jgħixu fil-karozzi, fil-garaxxijiet u fl-irziezet.
Wegħdi oħra ntesew, bħal
wegħda tal-iskola ġdida f’San Pawl il-Baħar li kellha tkun lesta sentejn ilu,
bħat-trakka tal-motorsport, bħal wegħda ftit tax-xhur ilu li ssir sistema ta’
trasport tal-massa (bħal metro jew light-railway), biex tindirizza ż-żieda
fit-traffiku kawżata wkoll miż-żieda fl-immigrazzjoni u l-popolazzjoni.
F’Għawdex qed nerġgħu
nisimgħu l-wegħda ta’ sptar ġdid, għat-tielet sena konsekuttiva. Forsi
did-darba ma nibqgħux biss b’ħofra wara li ħallasna €50 miljun. Għal ħames
darba qed tissemma’ Qorti ġdida f’Għawdex. S’issa għadu ma nbeda xejn.
Għas-sitt budget in fila, iva għas-sitt darba, qed nerġgħu nisimgħu bl-embellishment ta’ Marsalforn u x-Xlendi.
Meta ser jibdew?
U tħallew barra għal
kollox l-Università u l-MCAST. Għax forsi l-edukazzjoni ta’ wliedna mhix priorità. Bħalma
tħalliet barra soluzzjoni għas-serq li qed isir mill-kontijiet tad-dawl u
l-ilma. Serq li f’ċertu każijiet li rajna jitla’ għal eluf ta’ ewro. Jimpurtah
minn dan il-Gvern? Jew l-aqwa li l-flus deħlin biex imbagħad joqgħod jieħu
pjaċir jaqla’ ċ-ċapċip għax jibgħat ftit ċekkijiet ‘l hemm u ‘l hawn?
Ftit li xejn smajna wkoll
dwar kif ser jiġu indirizzati l-problemi tal-għoli tal-ħajja. Il-ħobż,
il-ħalib, il-ġobon, toiletries,
soft-drinks, petrol, frott, ħaxix, ħut, il-gass, id-dawl u l-ilma għolew.
Żieda ta’ €2.33 fil-ġimgħa taħsbu li hi biżżejjed biex tagħmel tajjeb għal dawn
il-prodotti essenzjali għal kulħadd. B’mod partikolari għal dawk l-aktar
vulnerabbli?
L-isbaħ pero’ hija
l-ipokrezija li biha l-Ministru tal-Finanzi jgħidilna li se jdaħħal miżuri biex
jiġġieled il-ħasil tal-flus, meta warajh hemm Ministru, u c-Chief of Staff
tal-Prim Ministru tiegħu, li nqabdu fil-fatt jaħslu l-flus tat-tixħim u
l-korruzzjoni, u hu iddefendiehom. Imma kif trid tkun kredibbli, u tikkonvinċi
lil dak ix-xufier tat-taxi li l-Gvern ta’ pajjiżna mhuwiex korrott, meta għadu
jiddefendi lil dawk li nqabdu.
Il-Ministru tal-Finanzi
għandu bżonn jagħti ħarsa madwaru u jieħu azzjoni bis-serjetà jekk iridna nemmnuh li
għandu għal qalbu r-reputazzjoni ta’ pajjiżna.
Dan l-artiklu ġie ppublikat fil-ġurnal In-Nazzjon tal-Erbgħa 24 t' Ottubru 2018
Comments
Post a Comment