€5,000 kuljum

Figura li għandkom tibqgħu tiftakru. Għax huwa daqshekk li l-Ministru Konrad Mizzi u c-Chief-of-Staff tal-Prim Ministru Keith Schembri kienu qed jippjanaw li jisirqu minn fuq dahar il-poplu Malti permezz tal-proġett tal-powerstation tal-gass, il-monument tal-korruzzjoni li hemm ankrat f’Marsaxlokk.

Wieħed jifhem issa għalfejn dik il-ħerqa kollha biex tinbena powerstation li skont ħafna esperti stajna ngħaddu mingħajrha. Wieħed jifhem issa kif sar il-ftehim tax-xiri tal-fuels li minnu tlifna €14-il miljun, u li qed iwassal biex qed inħallsu l-prezz tal-petrol u diesel li konna nħallsu meta l-prezz taż-żejt kien terz ta’ li hu llum. Wieħed jifhem issa għalfejn il-kuntratt tax-xiri tal-gass ta’ din il-powerstation qed jorbotna bi prezz li hu d-doppju tal-prezz tas-suq tal-lum, xi ħaġa li ħadd minn dawk li analizza l-kuntratt ma seta’ jifhem. Wieħed jifhem issa għalfejn dan il-Gvern mal-ewwel wera li jippreferi jixtri d-dawl mingħand il-powerstation ­il-ġdida, minflok bi prezz ferm irħas minn fuq l-interconnector.

Għax mix-xiri mill-interconnector, ħadd ma kien ħa jimla butu. Ara mix-xiri mill-powerstation il-ġdida, ir-rata tidher li hi tajba ħafna għal Konrad Mizzi u Keith Schembri. Mhux għal pajjiż, dak ma jixtrix id-dawl b’rata tajba. Dak ħa jixtrieh bil-għoli. Imma mhux problema, imbagħad inġibhom bi ftit serq mill-kontijiet u mill-prezz tal-fuels. Imma għal kont tagħhom tal-kumpaniji tal-Panama r-rata kienet tajba ħafna. Preċiżament €5,000 kuljum. Kuljum. Hawn min jaqlagħhom f’xahrejn jekk ikollu impjieg tajjeb, hawn min jaqlagħhom f’sitt xhur jekk hu fuq il-paga minima. Imma huma rieduhom kuljum. Ma tmurx imutu bil-ġuħ. Ma tmurx la tiġi fuqna xi kriżi ekonomika u tinfaqgħalna l-bużżieqa, ibatu magħna. Il-kriżijiet inħallu l-pensjonanti, in-nies fuq paga baxxa u n-nies bla saqaf fuq rashom biex ibatuhom.

Il-Prim Ministru għamel ġimgħat itawwal u jilgħab għal ħin, jistenna inkjesta li hu kien qed jiġġieled biex ma tibdiex. Issa, wara li ġie magħfus minn Adrian Delia fil-Parlament, il-Ministru Owen Bonnici qal li sar jaf li l-Pulizija talbu inkjesta u li bdiet proprju issa.

Ejja ma noqogħdux induru mal-lewża. Il-fatti issa huma ċari quddiem kulħadd. Konrad Mizzi u Keith Schembri kienu qed jippjanaw li jdaħħlu €5,000 kuljum mingħand wieħed mill-partners tal-Electrogas. Dan hu fatt. U sakemm ma joħorġux b’xi teorija fantaxjentifika, m’hemm l-ebda mod legali kif Ministru jaqla’ €5,000 kuljum jekk mhux bil-korruzzjoni. F’dan l-istadju mhux inkjesti rridu, imma li l-Pulizija jipproċedu krimalment. Anke għax ħafna mill-provi diġa’ kienu nġabru mill-FIAU aktar minn sena ilu u ġew mgħoddija lill-Pulizija.

Il-ħasra hi li n-nuqqas ta’ azzjoni mill-awtoritajiet qed tkompli tagħmel isem ħażin lir-reputazzjoni ta’ pajjiżna. Sa dil-ġimgħa stess naqra rapport ta’ konferenza internazzjonali li saret Londra l-ġimgħa l-oħra, u li fiha l-ispeċjalista finanzjarju David Marchant ta parir lill-investituri biex ma jersqux lejn Malta. “Steer clear of Malta” kienu l-kliem preċiż li uża.

U dan ħa jkollu riperkussjonijiet kbar, mhux biss fuqna imma aktar fuq uliedna. Għamilna snin nibnu reputazzjoni b’saħħitha biex nattiraw l-investiment u niċeċ ġodda tal-ekonomija, u ser inkunu qed narmu kollox mar-riħ għax tnejn min-nies riedu jimlew buthom u jiffangaw malajr, u għax sabu Prim Ministru li kien lest jgħattilhom. Prim Ministru li hu kompliċi magħhom. Prim Ministru li ma baqagħlu l-ebda kredenzjali biex jiġġieled il-korruzzjoni u biex isewwi l-ħsara li għamel lil pajjiżna.

Irridu nibqgħu determinati li neżiġu ġustizzja u biex min għamel din il-ħsara lil pajjiżna jħallas il-konsegwenzi ta għemilu.

Dan l-artiklu deher f' In-Nazzjoni tal-Erbgħa 21 ta' Novembru 2018