Matul il-ġimgħa
li għaddiet, flimkien mal-Kap tal-Partit Nazzjonalista Adrian Delia, attendejna
għall-Kungress tal-Partit Popolari Ewropew (EPP). Il-Partit Popolari Ewropew
huwa l-familja ta’ partiti taċ-ċentru u partiti bbażati fuq id-Demokrazija
Kristjana li l-Partit Nazzjonalista jagħmel partit minnha. Fil-Parlament
Ewropew, dan hu l-ikbar Partit, u għalkemm m’għandux maġġoranza assoluta u
allura jiddependi minn alleanzi u koalizzjonijiet ma’ partiti oħra f’ħafna
mill-leġislazzjoni li jressaq, bla dubju ta’ xejn huwa l-akbar Grupp
influwenti. Fil-fatt, kemm il-President tal-Parlament Ewropew Antonio Tajani,
il-President tal-Kummissjoni Ewropea Jean-Claude Juncker, u l-President
tal-Kunsill Ewropew Donald Tusk, huma kollha politiċi ġejjin minn dan
il-Partit.
Kien biss is-sena
l-oħra li Malta organizzat dan il-Kungress annwali. Din is-sena, dan
il-Kungress sar fil-belt ta’ Helsinki fil-Finlandja. U ma kienx Kungress
normali, kien Kungress li fih saret l-elezzjoni ta’ dak magħruf bħala
Spitzenkandidat tal-EPP għall-President tal-Kummissjoni Ewropea
fl-elezzjonijiet tal-Parlament Ewropew tas-sena d-dieħla. Tgħiduli x’għandu
x’jaqsam il-President tal-Kummissjoni mal-Parlament Ewropew?
Sistema li kienet
ġiet maqbula wara t-Trattat ta’ Lisbona, biex tagħti iżjed leġittimità lill-Kummissjoni Ewropea u ma tkunx biss magħżula
mill-Gvernijiet tal-Istati Membri, kienet dik li kull Partit fil-Parlament
Ewropew ikollu l-kandidat tiegħu għal President tal-Kummissjoni, imbagħad dak
il-Partit li jġib l-aktar siġġijiet ikun dak li bil-kandidat tiegħu bħala
President jipprova jġib maġġoranza biex japprova l-Kummissjoni Ewropea. Sistema
simili ta’ kif Partiti f’koalizzjoni jġibu maġġoranza flimkien biex japprovaw
Gvern. B’hekk, anke l-Kummissjoni Ewropea jkollha leġittimità ġejja mill-vot tal-poplu.
F’dan il-Kungress
allura l-EPP kellu jagħżel min ħa jkun il-kandidat tiegħu. U kkontestaw żewġ
kandidati. Dawn kienu Manfred Weber, mill-Partit tas-CSU fil-Ġermanja li hu
l-Kap preżenti tal-Partit Popolari fil-Parlament Ewropew, u li ħafna minnha
żgur nafuh għal ħbiberija li dejjem kellu mal-Membri Parlamentari Ewropej
Maltin u l-appoġġ li dejjem kien ta lil Simon Busuttil; u Alex Stubbs,
mill-Partit Kokoomus fil-Finlandja, li kien Ministru tal-Finanzi u għal ftit
żmien anke Prim Ministru fil-Finlandja.
Iż-żewġ kandidati
kienu kandidati validissimi, iżda d-delegazzjoni tagħna esprimiet sa mill-bidu
l-appoġġ tagħha lil Manfred Weber, li rebaħ din l-elezzjoni b’492 vot kontra
127. Il-Partit Nazzjonalista f’din l-elezzjoni kellu 10 voti, tlieta minnhom
tal-MEPs tagħna, u s-seba’ l-oħra għad-delegati tal-Partit, inkluż il-Kap,
Segretarju Ġenerali, Presidenti u Uffiċċjali. Kellna wkoll vot ieħor permezz
tal-Viċi Kap David Agius li huwa Viċi President tal-Ħaddiema Demokristjani
(EUCDW), fergħa tal-EPP li magħha hija affiljata l-SĦPN (Solidarjetà Ħaddiema).
Apparti l-vot
tal-iSpitzenkandidat, bħala delegazzjoni pparteċipajna wkoll f’numru ta’
laqgħat bilaterali ma’ Prim Ministri u Kapijiet tal-Oppożizzjoni fl-istess
familja tagħna fl-Ewropa, kif ukoll mal-istess Weber u Stubbs, u ma’ Dana
Murphy, li ser ikun qed jikkordina l-kampanja tal-EPP fil-pajjiżi kollha membri
bejn issa u Mejju li ġej.
Tressqu wkoll
numru ta’ policy papers u riżoluzzjonijiet biex jikkonfermaw il-pożizzjoni
tal-EPP fuq diversi kwistjonijiet li qed jaffaċċjaw il-popli Ewropej,
partikolarment is-sigurtà, il-kontroll tal-fruntieri u l-immigrazzjoni, l-ambjent u t-tibdil
fil-klima, id-difiża tal-valuri Ewropej u tal-libertà tal-espressjoni,
il-ġlieda kontra l-korruzzjoni u l-kriminalità organizzata u l-importanza
tas-saltna tad-dritt f’kull pajjiż. Il-kontenut kollu wieħed jista’ jaqrah hawn.
Wieħed mal-ewwel
jinnota li dawn il-kwistjonijiet huma relevanti ħafna wkoll għal Malta, u
l-pożizzjonijiet li qed jieħu l-EPP huma paralleli ma’ dawk tal-Partit
Nazzjonalista f’Malta, u fl-interess tal-poplu u n-nazzjon Malti. Il-votant
Malti għandu jżomm f’moħħu anke fl-elezzjonijiet li ġejjin li apparti li ser
ikun qed jagħżel il-Membri Parlamentari Ewropej ta’ Malta, ser ikun qed jagħżel
indirettament ukoll il-President tal-Kummissjoni Ewropea. Vot għal MEPs
tal-Partit Nazzjonalista jfisser ukoll vot għal Weber bħala President
tal-Kummissjoni.
Matul ix-xhur li ġejjin ser inkunu qed nispjegaw ħafna
aktar fid-dettal kif dan huwa ħafna iżjed fl-interess ta’ Malta mill-kandidati
l-oħra għal Presidenza li ser ikunu qed jippreżentaw il-Gruppi Parlamentari l-oħra,
fosthom is-soċjalisti.
Dan l-artiklu deher fir-rubrika Cyberspace fil-Mument tal-Ħadd 11 ta' Novembru 2018
Comments
Post a Comment