32 sena wara – l-istess kultura ta’ impunità

Din il-ġimgħa fakkarna t-32 sena anniversarju mill-qtil ta’ Raymond Caruana, u l-avvenimenti kollha li seħħu qablu u warajh. Il-mass meeting fiż-Żejtun, l-isparatura fuq il-każin ta’ Ħal Tarxien, l-isparatura li qatlet lil Raymond fil-Gudja, u naħseb l-agħar skandlu fl-istorja politika Maltija, il-frame-up ta’ persuna innoċenti u l-attentat ta’ qtil fuqha mill-istess Korp tal-Pulizija li suppost kien qed jipproteġieha u li suppost kien qed jinvestiga u jinterroga lil ħatja.

Raymond Caruana kien żagħżugħ Gudjan, bħali. Ma nafux, twelidt appuntu ftit xhur qabel il-qtil tiegħu. Jiftakru missieri li trabba miegħu fil-Gudja, u li kien biss b’xorti tajba li ma kienx magħhom fil-każin dakinhar. Kulħadd kien jafu bħala żagħżugħ kwiet imma ġenwin, li kien jagħmel minn kollox biex jgħinek. Il-ħolm ta’ ħajtu pero’ serquhulu, kissruhulu u qerduhulu, grupp ta’ kriminali politiċi li kienu draw f’kultura fejn jagħmlu li jridu għax jafu li l-Partit fil-Gvern kien ħa jgħattilhom.

U kif inhu rilevanti dan illum? Illum is-sitwazzjoni mhix il-bogħod. F’pajjiżna l-Gvern ta’ Joseph Muscat reġa’ rawwem kultura fejn jekk inti tkun ta’ ġewwa, tħoss li tista’ tagħmel li trid għax taf li l-Gvern ser jgħattilek. Għax taf li l-Kummissarju tal-Pulizija pupazz li kif ipoġġuh joqgħod. Għax taf li l-istituzzjonijiet suppost indipendenti huma kontrollati mill-Gvern, u allura m’għandekx għalfejn tinkwieta dwarhom. Kulma trid, tilgħaq lil min għandek tilgħaq.

Din il-mentalità tidher ċara fil-każ tal-iskandlu enormi tal-powerstation tal-Electrogas. Nafu issa li Konrad Mizzi u Keith Schembri fetħu kumpaniji sigrieti l-Panama, grazzi għal Brian Tonna, u li dawn il-kumpaniji kellhom idaħħlu €5,000 kuljum mingħand is-shareholder ewlieni tal-Electrogas, li ngħażlu mill-istess Brian Tonna biex jieħdu l-kuntratt tal-powerstation. Skandlu li qed iħammġilna wiċċna mad-dinja kollha. Fejn kull aġenzija tal-aħbarijiet fid-dinja, u l-mexxejja tal-pajjiżi l-oħra Ewropej, baqgħu imbellħa. Għax kien jaħsbu li Malta pajjiż normali, u f’pajjiż normali, meta jfaqqa’ skandlu bħal dan, pruvat u dokumentat, mhux biss il-politiċi jirriżenjaw iżda jitressqu l-Qorti taħt arrest.

Iżda f’Malta, il-Prim Ministru ma ra xejn ħażin. Ma fehemx xi jfissru dawn il-fatti li qed jara kulħadd. Anzi, qalilna ma ninkwetawx għax fuq il-ħasil tal-flus mhux qed jiġu investigati Keith Schembri u Konrad Mizzi, imma qed tiġi investigata biss il-kumpanija li ħa tgħaddilhom il-flus. Qed nerġgħu ngħixu f’sitwazzjoni fejn qisu l-poplu Malti ra sparatura sseħħ quddiemu, u l-Prim Ministru jibqa’ jgħidilna li qed jiġi investigat biss is-senter, imma mhux sidu u lanqas min għafas il-grillu!

32 sena ilu kellna Gvern li ddefenda u għatta lil min spara u qatel. Illum, għandna Gvern li jiddefendi u jgħatti lil min jisraq, jikkorrompi u jaħsel il-flus maħmuġin.

32 sena ilum kellna Gvern u Korp tal-Pulizija li meta waslet għandhom l-arma tad-delitt tal-qtil ta’ Raymon, l-akbar prova li jista’ jkollok f’delitt, flok investigaw lil min tahielhom u ressquh il-Qorti, użawha biex ostru l-ġustizzja, użawha biex għamlu frame-up fuq bniedem innoċenti li mbagħad anke pruvaw joqtluh biex joqtlu l-verità miegħu. Illum għandna l-istess sitwazzjoni, fejn il-Gvern u l-Korp tal-Pulizija jaslulhom il-provi tar-reat, jaslulhom ir-rapporti tal-FIAU, jitkellmu l-whistleblowers, iżda flok jieħdu azzjoni jaraw kif ħa jostru l-ġustizzja, kif ħa jaħbu l-provi, kif ħa jħallu l-kriminali jiġru barra.

Għax dak biss li nbidel minn 32 sena ilu. Fejn il-kriminali qabel kienu jiġru fit-toroq bil-jeeps iwerwru n-nies bil-machine guns, illum jiġru fil-kurituri tal-poter jisirqu lin-nies, moħbija wara l-ġlekk u l-ingravata. Imma kriminali jibqgħu.

Għaddew 32 sena, imma dak li qed ngħixu llum huwa ripetizzjoni ta’ dak li għex il-poplu Malti fit-tmeninijiet. Il-ġlidiet li saru fil-passat, irridu ngerġgħu nagħmluhom illum. U f’din il-ġlieda, il-Partit Nazzjonalista ser ikun fuq quddiem biex flimkien nerġgħu ngħixu f’pajjiż normali fejn isaltnu l-ġustizzja, id-demokrazija u l-libertà. Biex dak li ħadmu u batew għalih missirijietna, ma jkunx ta’ xejn. U biex il-prezz li ħallas b’demmu Raymond Caruana, ma jkunx tħallas għalxejn.

Dan l-artiklu deher fil-ħarġa tal-Mument tal-Ħadd 9 ta' Diċembru 2018