Dawn iż-żminijiet ta’ festi huma żmien fejn nippruvaw nieqfu minn ħafna battibekki u mill-ħafna ġenn ta’ matul is-sena, u nippruvaw inqattgħu iktar ħin mal-familji tagħna u ma’ dawk l-aktar qrib tagħna. U hekk inhu xieraq, għax fl-aħħar mill-aħħar, dak li jibqa’ mill-ħajja la huma l-flus, la l-fama, lanqas il-poter. Jibqa’ biss ir-relazzjonijiet li nkunu bnejna ma’ dawk ta’ madwarna tul ħajjitna.
Iżda f’dan iż-żmien huwa wkoll żmien ta’ solidarjetà. Żmien fejn niftakru aktar f’nies li għandhom bżonn l-għajnuna. U allura jkun hawn diversi kampanji ta’ karità u ta’ solidarjetà. Kollha huma tajbin u importanti ħafna li lkoll nagħtu sehemna biex ngħinu kemm nistgħu, għax fl-aħħar mill-aħħar mingħajr riżorsi materjali u finanzjarji ħafna minn dawn l-atti u dawn l-istituzzjonijiet ta’ għajnuna ma jkunux jistgħu jiġu operati.
Pero’ nemmen li lkoll kemm aħna għandna mmorru oltre’ milli sempliċiment nagħtu donazzjoni. Ħafna drabi faċli illi billi sempliċiment nagħtu donazzjoni nsikktu l-kuxjenza tagħna, biex inħossuna tajjeb u nserrħu moħħna li għamilna xi ħaġa ta’ ġid. Li tagħti donazzjoni huwa tajjeb, iżda huwa biss l-ewwel pass. Jekk irridu ngħixu tassew f’soċjetà li jimpurtaha, f’soċjetà li ma tinsa lil ħadd, irridu mmorru oltre’ minn hekk.
F’dawn iż-żminijiet ikun hawn ħafna nies waħedhom. Ħafna nies f’solitudni. Ħafna nies li jħossuhom minsija, li m’hawn ħadd min jagħti kashom. Kemm inkunu iżjed qed ngħixu l-ispirtu tal-Milied jekk f’dan iż-żmien forsi nippruvaw nawguraw lil xi ħadd li nafu li jinsab waħdu. Jekk infittxu li nagħtu ftit siegħat ta’ volontarjat f’xi istitut jew xi dar li nafu li qed isir xi xogħol. Jekk anke jkollna kuraġġ li nżuru priġunier wieħed illi ma tafux, ma jiġix minnhekk, imma m’għandu lil ħadd jaħseb fih.
Għax m’hemm l-ebda donazzjoni li hi aktar prezzjuża mill-ħin. L-ebda donazzjoni mhi aktar prezzjuża mill-kuntatt uman.
Għalhekk nappella biex f’dawn iż-żminijiet, ninsew ftit l-inidividwaliżmu, il-konsumiżmu, l-egoiżmu li jiġri magħna matul il-kumplament tas-sena, u nippruvaw ftit nagħtu kas ħaddieħor. Nippruvaw li almenu għal ftit żmien, jimpurtana minn min is-soltu niġu naqgħu u nqumu minnu.
Naħseb li hekk huwa l-isbaħ mod kif wieħed jista’ tassew jgħix l-ispirtu tal-Milied, u l-isbaħ mod kif wieħed jibda sena ġdida.
Minn qalbi nawgura lilkom ilkoll Milied hieni mimli barka u sliem.
Dan l-artiklu deher fir-rubrika 'Cyberspace' fil-ġurnal il-Mument ta' nhar il-Ħadd 23 ta' Diċembru 2018
Comments
Post a Comment