Il-ġimgħa l-oħra ġie
pubblikat ir-rapport tal-Uffiċċju tal-Awditur Ġenerali dwar l-investigazzjoni
li hu għamel fuq il-kuntratt tal-Electrogas, il-powerstation il-ġdida tal-gass f’Delimara li kienet il-wegħda
ewlenija tal-Partit Laburista fl-elezzjoni 2013. Dan ir-rapport jinsab
aċċessibbli online fis-sit
tal-Uffiċċju tal-Awditur Ġenerali fuq http://nao.gov.mt/en/recent-publications.
Hemm il-verżjoni sħiħa ta’ kważi 600 paġna, u verżjoni mqassra (abridge) ta’ 52
paġna. Nissuġġerilkom ittuh daqqa t’għajn ħalli tevalwaw dak li qed jingħad
fil-media b’moħħkom.
F’kull parti
tiegħu, ir-rapport jikkritika l-proċess tal-għażla. Jitkellem fuq kif inbidlu
t-termini bejn l-ewwel Espressjoni ta’ Interess, u t-tieni parti tar-Rikjesta
għal Proposti. Termini li nbidlu biex jiffavorixxu lil xi ħadd fuq ieħor.
Jitkellem fuq kif
ġew skwalifikati bidders għal raġunijiet li jekk tintuża’ l-istess riga,
kellhom jiġu skwalifikati fuqhom l-Electrogas ukoll. Jgħid li l-Electrogas ma
kellhomx il-minimu ta’ dak li kien mitlub biex jikkwalifikaw.
Jgħid li kien
irregolari li l-Gasol, li kienu parti mill-Electrogas, f’nofs il-proċess biegħu
l-ishma tagħhom lill-kumplament tal-membri tal-Electrogas. Dan bidel
il-kompożizzjoni tal-konsorzju, li kienet kontra r-regoli tal-RfP li kien ħareġ
il-Gvern. Ma jifhimx ukoll kif dawn kellhom mal-€20 miljun inqas
fil-finanzjament, li kieku sar due
diligence kif suppost kienet ukoll tiskwalifikahom.
Jgħid ukoll kif
il-Bord tal-Għażla kien immexxi minn Brian Tonna, ta’ Nexia BT, li mbagħad
serva bħala l-awditur tal-GEM Holdins, waħda mill-kumpaniji tal-Electrogas
innifisha, u li kien hu li waqqaf il-kumpaniji ta’ Konrad Mizzi u Keith
Schembri u li fihom iddikjaraw li ħa jdaħħlu €150,000 fix-xahar mingħand
l-ikbar shareholder tal-Electrogas,
Yorgen Fenech. Jgħid ukoll li f’dan l-istess Bord, jew Kumitat, kien hemm
id-DNV Kema, li niftakruhom qabel l-elezzjoni jtuna preżentazzjoni li tgħid
kemm hi tajba l-proposta tal-Partit Laburista tal-powerstation il-ġdida.
Jgħid kemm hi
stramba, u mhux normali, li s-Socar tal-Azerbaijan, li magħhom sar il-ftehim
għax-xiri tal-gass, ikunu wkoll parti mill-Electrogas li qed tixtri. Jgħid li
l-esperti tiegħu dan it-tip ta’ inċest qatt ma rawh. Hawn niftakru li fix-xiri
tal-gass tlifna mal-€40 miljun għax minflok xtrajna mingħand is-Shell xtrajna
mingħand is-Socar, li għax m’għandhomx gass, jixtruh huma mingħand is-Shell.
Jattakka bl-aħrax
il-Garanzija Bankarja ta’ €450 miljun li għamel il-Gvern fuq is-self
tal-Electrogas. Jgħid li din tathom vantaġġ fuq bidders oħra, mentri t-talba kienet biex min jieħu l-proġett
jiffinanzjah waħdu. Jgħid li din esponiet lill-pajjiż għal riskji kbar,
eżaġerati u bla bżonn.
Jikkonferma li
minħabba dan il-ftehim, maħniex nużaw l-interconnector bl-aħjar potenzjal
tiegħu. Qed nixtru l-enerġija mingħand l-Electrogas għal iktar minn €50 ogħla
kull MWh (jiġifieri kull 1,000 unit) milli kieku nixtruha minn fuq
l-interconnector. Jikkonferma wkoll dak li kien iwissi fuqu l-Partit
Nazzjonalista sa mill-bidu: li minħabba dan il-ftehim spiċċajna nixtru iktar
minn fuq l-interconnector meta jkun għoli, u inqas meta jkun l-orħos.
Jistaqsi wkoll
x’sens tagħmel li l-Kabinet, wara Ġunju 2017, awtorizza lill-Ministru
tat-Turiżmu Konrad Mizzi biex jiffirma xi kuntratti tal-ftehim tax-xiri
tal-enerġija, minflok lill-Ministru tal-Enerġija kif isir is-soltu.
Fil-ġimgħat li
ġejjin ser inkomplu nispjegaw x’sab l-Awditur f’dan il-ftehim, u għalfejn dan
ir-rapport jikkonferma li dan il-ftehim ħa jkun ta’ piż għal pajjiżna, għalina,
u għal ġenerazzjoni li ġejja, u ta’ warajha. Huwa tajjeb biss għal min minnu
qed igawdi €5,000 kuljum f’kontijiet u kumpaniji moħbija.
Dan l-artiklu deher fir-rubrika Cyberspace fil-ġurnal il-Mument ta' nhar il-Ħadd 2 ta' Diċembru 2018
Comments
Post a Comment