Bħal kull sena, l-għada tal-Milied issir l-Istrina. Appuntament annwali fejn il-poplu Malti jinsa d-differenzi, u jiġi flimkien biex jagħti minn dak li jista’ biex jgħin lil min hu fil-bżonn. Ħaġa tajba u sabiħa.
Spiss nibża’ pero’ li dan l-appuntament minflok ma qed jgħin biex nies fil-bżonn jingħataw dak li hu tagħhom bi dritt, qiegħed jistituzzjonalizza l-karità. X’jiġifieri?
Matul il-maratona li saret ħadt pjaċir nisma’ għal ħafna drabi lill-preżentatur Peppi Azzopardi jħeġġeġ lin-nies biex jagħtu u biex jikkontribwixxu, għax dawn in-nies għandhom bżonn din l-għajnuna bi dritt u mhux b’karità. U veru. Hemmhekk naqbel miegħu. Iżda allura, jekk din l-għajnuna għandhom jeħduha bi dritt, hija problema kbira li biex jeħduha rridu nagħmlu dan l-isforz kollu kull sena, u ndaħħlu jdejna fil-but, biex intuwhielhom. Għax din turi li allura din l-għajnuna għadha qed issir b’karità u mhux bi dritt. Kieku tassew din l-għajnuna qed jeħduha bi dritt, kieku jeħduha direttament mill-Gvern mingħajr ma jkollhom għalfejn jiġu jagħmlu wiċċhom fuq it-televiżjoni biex jippruvaw iqanqlu l-kuxjenza tal-poplu Malti biex jagħti dik ix-xi ħaġa oħra.
Issa jien l-ewwel wieħed li ndaħħal idi fil-but u nagħti, u mmur anke għal ftit ħin nagħti sehemi waqt l-attività. Iżda l-attività mihiex simbolu tas-solidarjetà tal-poplu. Hija s-simbolu tal-falliment tagħna bħalha Stat milli nagħtu din l-għajnuna bi dritt. Jekk bniedem għaddej minn mard li għalih għandu bżonn jittieħed għal kura barra mill-pajjiż, l-ispejjeż ta’ dan għalfejn m’għandux jagħtihomlu l-Istat? Ilbieraħ inġabru €7 miljuni li bihom ser issir differenza lil tant familji. Iżda x’inhuma €7 miljuni fil-budget annwali tagħna bħala pajjiż? Xejn. Farka. Il-pajjiż għandu budget ta’ aktar minn €4 biljuni. Jiġifieri ta’ €4,000 miljun. X’tiswa’ li sebgħa biss minnhom jintużaw għal dan il-għan u nevitaw li dawn in-nies ikollhom iservu ta’ tallaba? Hekk jew hekk, it-63 passaport li nxtraw bejn żewġ familji mill-Arabja Sawdita waħedhom itellgħu diġa’ €3 miljuni minnhom. Billi €4 miljuni flok marru għand il-Cafe’ Premier, jew mijiet ta’ miljuni flok marru fil-prezz baxx tal-art li ngħatat lid-DB u li ħa tingħata lil Corinthia, marru direttament għal dawn in-nies, ma kienx ikun ħafna aħjar?
Imma le. Nippreferu nħallu lil dawn in-nies jittallbu għall-għajnuna ħalli mbagħad ikun hemm min jidher sabiħ li l-għajnuna qed itihielhom b’karità flok bi dritt. U ħalli mbagħad min ikun tant seraqhom f’ħadmiet oxxeni mal-Gvern u mal-Istat, jiġi jagħmilha tal-pampalun quddiem kulħadd jagħti ċ-ċekkijiet kbar, biex jaħsel dak li seraq, isikket il-kuxjenzi, u jixtri s-simpatiji.
U għalhekk kien żball li xi ħaġa bħalma hi l-Community Chest Fund, li qiegħda hemm biex tagħmel tajjeb għan-nuqqasijiet tal-Gvern u tal-Istat, ittieħdet direttament taħt il-President u allura taħt ir-rappreżentant/a tal-Istat innifsu! Nittama li l-President li jmiss ma jagħmilx l-istess żball taż-żewġ Presidenti ta’ qablu u jibqa’ fil-libertà li jitkellem favur id-dritt ta’ din l-għajnuna, minflok ma jelevaha bħala karità. Ikun President li jaħdem biex ma jkunx hemm bżonn iżjed ta’ Community Chest Fund, tal-Istrina, u tal-isfruttament tan-nies fil-bżonn, altru milli jagħmilhom il-funzjoni primarja tiegħu. Għax tassew l-għajnuna lejhom tkun qed tingħata bi dritt u mhux b’karità.
Jien minn qalbi nawgura s-sena t-tajba lil kulħadd. Żgur li ser tkun sena ta’ ħafna sfidi, ta’ mumenti sbieħ u ta’ mumenti koroh, li iżda flimkien nistgħu niċċelebraw u nistgħu negħlbu, jekk tassew ninsew l-individwaliżmu u naħdmu għal soċjetà li jimpurtaha minn kull wieħed u waħda minna.
Dan l-artiklu deher fil-ġurnal Il-Mument ta' nhar il-Ħadd 30 ta' Diċembru 2018
Comments
Post a Comment