Matul dawn
il-ġranet, is-sit The Shift News żvela għall-ewwel darba numru ta’ dettalji
dwar il-ftehim iffirmat bejn Steward Healtchare u Vitals Global Healthcare dwar
it-trasferiment tal-konċessjoni ta’ tliet sptarijiet pubbliċi. Ftehim li s’issa
inżamm moħbi mill-pubbliku u li l-Gvern irrifjuta li jagħti dettajli dwaru
fil-Parlament.
Il-ftehim jikxef
dettalji xokkanti. Juri li Steward Healthcare xtrat il-Vitals għal €1 biss,
iżda li fil-ftehim għaddew miljuni kbar bejn l-idejn u għand is-sidien moħbija tal-Vitals.
Dawn il-ħlasijiet
jinkludu €1.4 miljun li għaddew għand kumpanija misterjuża reġistrata
fid-Dubaj, u €1.85 miljun lil individwu ieħor, bl-isem ta’ Samuel Loft. Għaddew
ukoll ammont mhux magħruf ta’ fondi għand investitur bl-isem ta’ Dr Ambrish
Gupta. Dan f’għanqbuta ta’ strutturi u kumpaniji oħra, reġistrati fost l-oħrajn
f’Jersey, li jżommu ishma tal-Vitals u ta’ kumpaniji relatati biex is-sidien
veri li qed igawdu minn dawn il-ħlasijiet jibqgħu moħbija.
Joħroġ minn dan
il-ftehim li s-sidien veri tal-Vitals, moħbija wara dawn l-istrutturi, ħadu
diversi management fees u commissions mingħand il-Vitals proprju
eżatt qabel dawn għaddew il-konċessjonijiet tagħhom lil Steward.
Il-ftehim juri
wkoll li ġew iffirmati kuntratti u deals
bejn Steward u dawn il-kumpaniji mwaqqfa f’Jersey li jassikuraw li jkun hemm
dħul kostanti sejjer mis-servizz tas-saħħa f’Malta lejn dawn il-kumpaniji, għal
proġett li qatt ma waslu fi tmiemu.
Jidher li għal
dan il-prezz ta’ €1, Steward ħadu konċessjoni li tiswa fi qliegħ ta’ madwar €70
miljun fis-sena, jew aħjar €188,000 kuljum, mingħand il-poplu Malti u Għawdxi,
potenzjalment għad-99 sena li ġejjin.
Joħorġu wkoll
dettalji ġodda dwar il-kumpanija Technoline, li eventwalment ħadet
l-esklussività li tissuplixxi makkinarju mediku
għall-isptarijiet. Jidher li s-sidien moħbija tal-Vitals għaddew il-€5 miljuni
li kellu bżonn ċertu Ivan Vassallo biex xtara l-ishma kollha tal-kumpanija
Technoline, qabel ma’ din ħadet din l-esklussività.
Dan juri kif Vitals
kienu qed jiżguraw li jagħtu din l-esklussività tal-provvista
tal-makkinarju lilhom infushom, biex il-mument li jgħaddu kollox lil Steward,
huma jiżguraw li jibqgħu idaħħlu l-flus mill-provvista ta’ dan il-makkinarju
permezz ta’ din il-kumpanija Technoline. Għadu mhux ċar dawn il-€5 miljuni
kienux ġew mit-taxxi tal-poplu Malti stess.
Ġie żvelat ukoll
kif Vitals ma kienet kumpanija globali xejn. Is-sidien moħbija tagħha, ftit
qabel ma tefgħu l-offerta tagħhom għal konċessjoni tal-isptarijiet, waqfu
network ta’ kumpaniji reġistrati f’postijiet differenti madwar id-dinja biex
jagħtu x’jifhmu li huma xi kumpanija medika globali, mentri fil-verità ma kellha ebda esperjenza fis-settur. Anzi, użaw
il-fatt li kienu ħa jieħdu t-tender f’Malta biex jippruvaw jitfgħu l-offerti
tagħhom għal servizzi simili f’pajjiżi oħra barranin.
Ir-riżultat aħħar
tal-ftehim ma’ Vitals huwa li dawn ħadu €50 miljun mingħand il-poplu Malti, u
kulma ħallewlu kienet ħofra, u djun rappurtati ta’ €55 miljun.
Is-sit fir-raba’
u l-aħħar storja li tella’ sa ma ktibt dan l-artiklu, jagħti x’jifhem ukoll li
ser jiżvela kumpanija Maltija li kienet involuta u li ġiet mixtrija minn
Vitals, u li s’issa ma ssemmietx.
Nistennew biex
naraw din l-investigazzjoni ġurnalistika x’dettalji oħra ser tikxef dwar din
il-konċessjoni skandaluża tas-servizz tas-saħħa tagħna. Jidher ċar ukoll li
hemm nies fil-poter li xejn mhu togħġobhom li qed jiġu żvelati dawn
id-dettalji, u infatti dan is-sit soffra minn attak ċibernetiku biex ma jkunx
jista’ jiffunzjona tajjeb. Dan hu att kundannabbli li jmur kontra l-libertà
tal-espressjoni u kontra d-dritt tal-poplu li jkun infurmat, u nittama li
l-Pulizija tkun qiegħda tinvestiga.
Il-mistoqsija prinċipali
li tibqa’ f’moħħ kulħadd hi għalfejn il-Gvern Malti espona s-servizz tas-saħħa
għal dawn ir-riskji sempliċiment biex jiżgura li jgħaddu miljuni għand
interessi privati ta’ individwi moħbija? Min huma dawn l-individwi? U kif għal
darb’oħra, ftehim jinten bħal dan, seħħ taħt id-direzzjoni ta’ Konrad Mizzi u
Keith Schembri?
Dan l-artiklu deher fil-ħarġa tan-Nazzjon ta' nhar l-Erbgħa 16 ta' Jannar 2019.
Comments
Post a Comment