Punti minn din il-ġimgħa

Paternity Leave

Din il-ġimgħa intlaħaq ftehim bejn il-Parlament Ewropew u l-Kunsill tal-Ministri fuq direttiva li mexxa fil-Parlament Ewropew l-MEP Nazzjonalista David Casa. B’din id-direttiva, l-irġiel kollha fl-Unjoni Ewropea ser jingħataw id-dritt ta’ minimu ta’ għaxart ijiem ta’ leave tal-paternità meta jsiru missirijiet, li l-ħlas li jieħdu f’dan il-leave ma jkunx inqas mill-ħlas tas-sick leave ta’ dak il-pajjiż (ara hawn).

F’pajjiżna dan ifisser qabża mill-mimimu ta’ ġurnata waħda leave tal-paternità li għandna bħalissa għal għaxart ijiem, qabża sinifikanti li ser tkun ittejjeb bil-kbir il-kwalità tal-ħajja tal-familji. Għal żmien twil tkellimna ħafna fuq il-leave għall-ommijiet, però jekk vera nemmnu fl-ugwaljanza, għandna naraw li għandna f’dak li huwa leave tal-ġenituri nibdew issa nżidu d-drittijiet tal-missirijiet sabiex anke huma jaqsmu aktar mal-ħajja tal-familja.

Id-direttiva tagħti wkoll dritt ta’ ħamest ijiem leave lil dawk li jieħdu ħsieb lil xi qarib f’darhom, u erba’ xhur leave tal-ġenituri.

Din id-direttiva issa jsir il-vot fuqha fil-plenarja tal-Parlament Ewropew fil-ġimgħat li ġejjin u tkun introdotta fil-pajjiżi kollha tal-Unjoni Ewropea.

Palazzo Giannin salvat

Kultant mill-Awtorità tal-Ippjanar toħroġ aħbar tajba. Din il-ġimgħa l-Awtorità iddeċidiet li twaqqaf l-applikazzjoni għal bini ta’ tletin appartament minflok Palazzo Giannin, ġnien barokk u skedat f’nofs Ħal Għaxaq, li apparti l-wirt storiku tiegħu joffri wkoll pulmun ambjentali f’nofs dan ir-raħal (ara hawn).

Kburi li flimkien ma’ numru ta’ residenti oħra ġbarna petizzjoni u ressaqna l-oġġezzjonijiet tagħna għal dan il-proġett. Nittamaw li din ma tkunx biss rebħa temporanja, iżda l-livell ta’ skedar ta’ dan il-ġnien jiżdied, u jekk hemm bżonn jiġi rekwiżit mill-Gvern sabiex jitgawda mill-pubbliku u sabiex jiġi salvagwardjat għal ġejjien.

 L-Art tal-Corinthia

Matul din il-ġimgħa, il-Partit Nazzjonalista kompla jagħmel pressjoni sabiex jinbidel il-ftehim li l-Gvern irid jagħmel biex jagħti lill-Grupp Corinthia din l-art kollha għal prezz baxx u mingħajr restrizzjonijiet, li minnha ser igawdi l-profitt tal-privat mingħajr ma l-pubbliku jieħu dak li ħaqqu. Mal-Partit Nazzjonalista issa ingħaqdu wkoll numru ta’ NGOs, Kunsilli Lokali u r-residenti infushom, li wieħed minnhom stess fetaħ protest ġudizzjarju kontra Joseph Muscat u Konrad Mizzi dwar dan il-ftehim (ara hawn).

Dan il-ftehim jidher li qasam il-Kabinett u l-Grupp Parlamentari Laburista, b’numru ta’ Deputati u anke Ministri li qed jagħmlu pressjoni biex dan il-ftehim jinbidel għax hu inġust mal-poplu Malti kif ukoll ma’ investituri oħra li mhux jingħataw preferenzi bħal dawn.

Keith Schembri jkompli jaħrab

Din il-ġimgħa kompliet ukoll il-kawża ta’ libell li fetaħ Keith Schembri kontra l-ex-Kap tal-Partit Nazzjonalista Simon Busuttil. Fil-kawża din il-ġimgħa Keith Schembri talab li l-Qorti tordna li hu ma jkollu għalfejn iwieġeb mistoqsijiet dwar 17 Black (ara hawn). Il-Qorti ser tkun qed tiddeċiedi dwar din it-talba fis-7 ta’ Marzu. Però din żgur li hija ammissjoni ċara li dwar 17 Black, Keith Schembri għandu l-faħam miblul, għax kieku ma jkollu l-ebda problema jwieġeb fuqha. Jaħrab kemm jaħrab, ċert li xi darba l-verità xi darba titla’ f’wiċċ l-ilma u l-ġustizzja sseħħ.

 Dan l-artiklu deher bħala parti mir-rubrika Cyberspace fil-Mument tal-Ħadd 27 ta' Jannar 2019