Għalkemm il-Gvern ta’ kuljum jipprova jifqagħna bil-propoganda ta’ “l-aqwa żmien”, li tipprova tbellagħhielna li kollox sejjer tajjeb, li ma stajniex inkunu aħjar, ir-realtà li qed jaslu għaliha u li qed jipperċepixxu analisti u aġenziji internazzjonali hija differenti ħafna.
Ilbieraħ ġiet
ippubblikata l-klassifika ta’ Transparency International dwar l-indiċi
tal-korruzzjoni tal-pajjiżi differenti. F’din il-klassifika, Malta waqgħet
tmien postijiet mis-sena l-oħra ‘l hawn u issa tinsab fl-54 post. Meta wieħed
jikkumpara mal-2004, Malta tilfet 29 post, għax dak iż-żmien, li kien l-ewwel
darba li dehret f’din il-klassifika, Malta kienet klassifikat fil-25 post.
Anke jekk wieħed
jikkumpara mal-2012, li kienet l-aħħar sena ta’ Gvern Nazzjonalista, Malta
tilfet 11-il post, għax fl-2012 kienet tinsab fit-43 post.
Malta ġabet marka
ta’ 54 minn 100, li ġġibha qrib ħafna tal-marka ta’ 49 li Transparency
International tqisha bħalha l-linja medja fejn fiha demokrazija ma tkunx qed
tiffunzjona.
Ir-raġunijiet li tagħti Transparency International għal din il-waqgħa mhumiex sorpriża. Huma l-istess affarijiet li l-Partit Nazzjonalista ilu jikkritika għax huwa ċar li qed inawwru r-reputazzjoni ta’ Malta u ser jisswewlna qares fil-ġejjien.
Fost l-oħrajn, TI
ssemmi l-qtil tal-ġurnalista investigattiva Daphne Caruana Galizia, li kienet
qed tikxef stejjer ta’ korruzzjoni enormi li fihom hemm imdaħħlin politiċi
fil-poter. Issemm l-iskandlu tal-Panama Papers u l-Bank Pilatus, u li ma sar
xejn fuqhom. Issemmi l-bejgħ tal-passaporti, li l-Kummissjoni Ewropea għadha
kemm qalet li fiha potenzjal kbir ta’ ħasil ta’ flus, u r-rapport
tal-Kummissjoni Venezja li ħareġ difetti kbar fil-mod kif qed titħaddem
id-demokrazija f’Malta.
Ftit tal-ġranet
ilu, Malta waqgħet ukoll fil-klassifika tal-indiċi tal-kwalità tal-ħajja li jippubblika The Expat Insider, organizzazzjoni
dinjija għal dawk li jgħixu barra minn pajjiżhom. Ir-rapport li tippubblika din
l-organizzazzjoni jagħti ħarsa lejn 68 pajjiż minn madwar id-dinja. F’dan
ir-rapport, Malta kien l-aktar pajjiż li sofra waqgħa kbira. Inżilna mid-19-il
post għat-38 post fil-lista tal-pajjiżi fejn jidħol kwalità tal-ħajja.
Ir-rapport jagħti wkoll raġunijiet għala din is-sena Malta klassifikat
daqstant lura, ibbażat fuq dak li jgħidu l-barranin li jgħixu f’Malta. Issemmi
l-aktar il-korruzzjoni endemika fil-livelli kollha tas-soċjetà Maltija u li
hija protetta minn fuq. Il-barranin jagħti marka baxxa ħafna tal-istabbilità
politika f’Malta. Wieħed jaħbat ser jiskanta kif jasħbuha hekk, meta f’Malta
l-Gvern jibqa’ “stabbli” għal leġislatura kollha waqt li f’pajjiżi barranin
għandu ħabta li ma jwassalx sal-aħħar tal-leġislatura ħafna iżjed spiss minn
Malta. Iżda mbagħad wieħed jifhem li l-istabbilità fil-politika mihix biss kemm
idum hemm il-Gvern, imma kemm is-sistema politika, inkluż il-ġudikatura,
il-libertà tal-espressjoni, l-indipendenza tal-awtoritajiet u
l-istituzzjonijiet, u l-bażijiet l-oħra tad-demokrazija, jaħdmu b’mod stabbli u
kif mistenni. U hawn Malta ma ħaditx isem tajjeb.
Il-kumment ġenerali li jagħtu l-barranin li jgħixu f’Malta huwa
“il-korruzzjoni orribbli f’kull qasam tal-iggvernar hi tal-biża’.” Dak hu kif
qed tħares lejnha d-dinja. Dik hi r-realtà li qed jgħix min jinsab f’pajjiżna u
mhux mogħmi mill-għamad politiku u partiġġjan. Dik hi r-realtà mnawwra li qed
ngħixu fiha aħna meta tneħħi l-maskla tal-“aqwa żmien” li tipprova tgħatti dan
kollu.
Irridu nkunu aħna li b’rieda tajba, ma naċċettawx din ir-realtà u ma
nirrassenjawx ruħna li pajjiżna ma jistax ikun differenti. Jista’. Nistgħu.
Jekk naħdmu lkoll flimkien u ma nibżgħux nitkellmu u nsemmgħu leħinna.
Dan l-artiklu deher fil-ħarġa tan-Nazzjon ta' nhar l-Erbgħa 30 ta' Jannar 2019.
Comments
Post a Comment