Flimkien għal pajjiżna
Matul din
il-ġimgħa tlaqqa’ l-Kunsill Ġenerali Amministrattiv tal-Partit Nazzjonalista. Dan
huwa l-Kunsill Ġenerali annwali li jsir fil-bidu tas-sena fejn il-Partit jagħti
ħarsa lejn il-ħidma amministrattiva tiegħu.
Team Start
Ftit tal-ġranet
ilu kelli l-privileġġ li bħala President tal-Kumitat Eżekuttiv nippresiedi
l-ewwel laqgħa tal-eżekuttiv tal-fergħa l-ġdida Team Start, team ta’ żgħażagħ
mimlijin b’entużjażmu, enerġija u ħeġġa. Din hi l-ewwel fergħa fil-Partit li hi
miftuħa għal żgħażagħ saħansitra taħt is-16-il sena, u twieldet frott ta’
tibdil fl-istatut li sar fil-Kunsill Ġenerali ta’ sena ilu li bih l-età tat-tesserament niżlet għal 14-il sena u
r-rappreżentanti tal-Kunsill Ġenerali fl-Eżekuttiv tal-Partit inbidlu minn 9
nisa u 9 irġiel għal 8 nisa, 8 irġiel u 8 żgħażagħ.
Din il-fergħa
hija fergħa oħra fis-siġra sabiħa tal-Partit Nazzjonalista, siġra li tiġbor
fiha nies b’fehmiet differenti, b’ideat differenti, iżda li hemm jgħaqqadna
l-istess għeruq: il-valuri u l-prinċipja li dejjem sawruna u żammewna flimkien.
Jien konvint li fi ħdan is-siġra tagħna, din ser tkun fergħa li tħalli ħafna
frott u li ser tagħti l-bażi li fuqha l-Partit jista’ jibni futur sabiħ.
Partit propożittiv
U issa bdejna
wkoll it-triq lejn l-elezzjonijiet tal-Parlament Ewropew u tal-Kunsilli Lokali
li ser isiru f’Mejju li ġej. U bħala Partit, bdejna minn issa nniedu sensiela
ta’ proposti u ta’ soluzzjonijiet għal problemi li qed jonqos milli jindirizza
l-Gvern. Fosthom, fi ftit ġimgħat, ħriġna proposti dwar l-ekonomija
fid-dokument ta’ qabel il-baġit f’Ottubru li għadda, tmenin proposta dwar
il-Kunsilli Lokali, proposti biex insalvaw il-biedja u l-prodott frisk lokali,
proposti biex tonqos il-burokrazija fit-trasferiment tal-qbiela, proposti
għar-riċiklaġġ tal-iskart tal-kostruzzjoni, proposti biex tissaħħaħ il-ġlieda
kontra l-kanċer, u fil-Parlament ressaqna l-liġi tas-Sammaritan it-Tajjeb biex
nipproteġu lil dawk li jagħtu l-ewwel għajnuna.
Dan juri ċar li
min jgħid li l-Partit Nazzjonalista huwa xi partit negattiv li ma joħroġx
b’ideat, mhux isegwi biżżejjed jew qed jigdeb b’mod intenzjonat. Il-Partit
Nazzjonalista mhuwiex biss Partit li jikxef il-ħażin u n-nuqqasijiet ta’ dan
il-Gvern, iżda Partit proattiv li qed joffri soluzzjonijiet u Gvern alternattiv.
Gvern negattiv
Bil-kontra
l-Gvern ta’ Joseph Muscat. Dan il-Gvern li tgħidx kemm kien jiftaħar li hu
pożittiv f’daqqa waħda qisu sar bil-maqlub. Għal ġimgħat sħaħ, l-unika forma
ta’ kampanja li għamel Joseph Muscat kienet kampanja negattiva u aggressiva ta’
tgħajjir fuq il-Membri Parlamentari Ewropej tal-Partit Nazzjonalista.
Jgħajjarhom tradituri, jgħajjarhom li qed jagħmlu l-ħsara lil pajjiż, u
jivvinta kull xorta ta’ qlajjiet fuqhom.
MEPs effettivi
Fir-realtà, il-ħidma tal-MEPs
Nazzjonalisti kienet waħda effettiva b’riżq is-servizzi u d-drittijiet
taċ-ċittadini. Fosthom direttiva għal bilanċ bejn il-ħajja u x-xogħol li tagħti
aktar ġranet ta’ leave lil missirijiet u lil min jieħu ħsieb membru tal-familja
li jkun marid, tisħiħ tad-difiża tal-ġurnalisti mill-iSLAPP, protezzjoni akbar
tal-whistleblowers, protezzjoni akbar għan-negozji ż-żgħar u l-konsumaturi li
jixtru online, aktar servizzi għad-diabetiċi u għal nies b’dyslexia, u anke
ħidma b’riżq pajjiżna bħal meta kienu huma li permezz tal-Partit Popolari
Ewropew waqqfu riżoluzzjoni tas-Soċjalisti nfushom li riedu jiddikjaraw lil
Malta bħala tax-haven, u liġi ġdida
biex jissaħħu l-fruntieri tal-Unjoni Ewropea.
Min hu t-traditur?
Mhux dawn kienu
t-tradituri. It-traditur huwa min l-ewwel rebaħ il-fiduċja tal-poplu u mbagħad
l-għada fetaħ il-kumpaniji l-Panama biex jisirqu, min biegħ is-servizz
tas-saħħa ta’ pajjiżna inkluż l-unika sptar ġenerali li għandna f’Għawdex, min
jgħid lil poplu li ma jistax jippretendi social
housing għal dejjem fl-istess nifs li jagħti art pubblika b’xejn għal
dejjem lil min diġa’ għandu ħafna, u min jagħti viża lil 500 Alġerin li ġew
rifjutati mill-Pulizija minħabba li huma ta’ theddida għas-sigurtà ta’ pajjiżna u tal-Ewropa.
Flimkien naslu
Quddiem din
it-theddida għal pajjiżna, jikber il-bżonn li aħna lkoll, Maltin u Għawdxin ta’
rieda tajba, niġu flimkien u naħdmu biex il-Partit Nazzjonalista jkun it-tama
li nerġgħu ngħollu isem pajjiżna u r-reputazzjoni tagħna u jerġa’ jkollna
politika differenti, politika moderna, politika propożittiva li ma tħalli lil
ebda individwu lura.
Dan l-artiklu deher bħala parti mir-rubrika Cyberspace fil-Mument tal-Ħadd 24 ta' Frar 2019
Comments
Post a Comment