Din il-ġimgħa l-Awditur Ġenerali ppubblika ir-rapport dwar l-investigazzjoni fuq il-ħruġ ta’ visas mill-Konsolat Malti fl-Alġerija bejn Marzu 2014 u Settembru 2015. Dan ir-rapport jinsab aċċessibbli fuq is-sit tal-Uffiċċju tal-Awditur Ġenerali f’din il-link: http://nao.gov.mt//loadfile/77c82f0e-89b3-44b4-85d4-e48ecfd251b0.
Huwa rapport komprensiv ta’ 89 paġna li jidħol f’diversi aspetti, sa mill-ftuħ ta’ dan il-konsolat għal ħabta ta’ Novembru 2013, meta l-Gvern poġġa bħala Konslu lil ħadd ħlief il-kuġin tal-Prim Ministru Joseph Muscat, sal-metodu użat għal ħruġ ta’ dawn il-visas, u anke fejn marru n-nies li ħadu dawn il-visas.
L-Awditur Ġenerali jgħid li ma ingħata l-ebda viżibilità u informazzjoni dwar il-proċessi użati fid-deċiżjonijiet tal-għoti ta’ dawn il-visas, u allura ma setax jikkonkludi kienx hemm xi ħlasijiet illeċiti. Ma setax lanqas jikkonkludi kienx hemm każi fejn ġew rifjutati u l-proċess ġie mtawwal apposta biex jintalbu ħlasijiet ħalli l-proċess jitkompla jew jitħaffef.
Jikkonferma però li f’Malta waslu 3,696 Alġerin b’visa maħruġa minn dan il-konsolat, numru pjuttost kbir meta mqabbel mal-visas simili mogħtija f’pajjiżi oħra. Iżda agħar minn hekk l-Awditur jiżvela dettalji li jikkonfermaw is-suspetti u l-argument li kien qed iġib il-Partit Nazzjonalista.
L-Awditur sab li minn dawn it-3,696 li waslu f’Malta, 2.846 persuna ma marrux lura lejn l-Alġerija u ntilfet kull traċċa tagħhom. Uħud jista’ jkun li baqgħu f’Malta, oħrajn jista’ jkun li vvjaġġaw fiz-zona Schengen, madwar l-Ewropa.
Ħaġa oħra inkwetanti li sab l-Awditur hija li 484 persuna ingħataw visa minkejja li l-Korp tal-Pulizija rrakkomanda li dawn jiġu rifjutati minħabba raġunijiet ta’ sigurtà. Din hija xokkanti, u inkwetanti mhux biss għal Malta iżda għal pajjiżi kollha taz-zona Schengen li fihom dawn setgħu jivvjaġġaw liberament grazzi għal visa mogħtija mill-konsolat Malti. Wieħed jistaqsi x’qatt setgħet kienet il-motivazzjoni biex dawn il-persuni tingħatalhom visa, proprju mill-kuġin tal-Prim Ministru, minkejja li l-Pulizija ġibdu l-attenzjoni u rrakkomandaw li dawn ma tingħatalhomx. Mhux qed nitkellmu fuq persuna jew tnejn, iżda fuq 484 persuna.
Dan jikkonferma li l-iskrutinju li kien qed isir ma kienx wieħed tal-livell mistenni minn pajjiż tal-Unjoni Ewropea, u f’każ bħal dawn wieħed jistenna li tintrefa’ r-responsabbilità. Kemm dik legali, kif ukoll dik politika.
Affarijiet serji bħal dawn ma jistgħux jitmexxew minn ħbieb tal-ħbieb biex tiġi moqdija l-istess xibka ta’ interessi moħbija. Wieħed jistenna li jitpoġġew nies serji u professjonali li jafu sew xogħolhom. Fejn ma jsirx hekk, ir-responsabbilità aħħarija hija tal-Gvern li appuntahom. U dan ikompli jiġġustifika wkoll ir-raġuni għala l-Partit Nazzjonalista oppona n-nomina ta’ Karl Izzo bħala ambaxxatur tal-Montenegro. Mhux biss għax mhuwiex diplomatiku u m’għandu l-ebda esperjenza fil-qasam, iżda għax huwa parti mill-istess xibka ta’ ħbieb tal-ħbieb. U meta wieħed jiftakar li l-Montenegro kien qed jidħol fl-istess tip ta’ kuntratti fl-oqsma tas-saħħa u tal-enerġija bħal dawk il-kuntratti jintnu li ddaħlet fihom Malta mill-Ministru Konrad Mizzi, id-dubju u l-mistoqsijiet ikomplu jikbru.
Dan l-artiklu deher bħala parti mir-rubrika Cyberspace fil-Mument tal-Ħadd 3 ta' Frar 2019
Comments
Post a Comment