Muscat ma jimpurtahx aktar

Ma jimpurtahx aktar

F’dawn l-aħħar ftit ġimgħat, il-Prim Ministru Joseph Muscat għamel xi dikjarazzjonijiet li skantaw ftit nies mhux ħażin. Kienu dikjarazzjonijiet insensittivi u li huma ammissjoni tal-falliment ta’ dan il-Gvern, xi ħaġa li Joseph Muscat is-soltu joqgħod ħafna attent li ma jagħmilx.

Smajna lil Joseph Muscat jiddikjara li jekk ma jkunux il-ħaddiema barranin li qed jimporta dan il-Gvern, ma jkollniex biex inħallsu l-pensjonijiet tal-anzjani tagħna. Ammissjoni ċara li minkejja l-ftaħir ta’ surplus, ta’ ekonomija soda, ta’ “l-aqwa fl-Ewropa”, il-politika ta’ dan il-Gvern ġabitna dipendenti biss fuq iż-żieda fil-popolazzjoni. Biex inħallsu l-pensjoni tal-anzjani li għamlu snin twal iħallsu l-bolla, irridu nġibu aktar ħaddiema jaħdmu. U x’ser jiġri għada, meta jkollna iżjed anzjani jgħixu aktar, li jkunu ħallsu l-bolla u li jkun jixirqilhom pensjoni? Kemm ser inkomplu niddependu biss fuq tkabbir tal-popolazzjoni?

Qalilna wkoll li parti mill-problema tal-pensjonijiet hija li l-anzjani mhux imutu qabel. Mhux hekk hux. Għax qatt mhu tort tiegħu jew tan-nuqqas ta’ pjanar tal-Gvern tiegħu. Qatt mhu tort tal-problema li qed joħloq hu stess bi tkabbir bla rażan u bla pjan tal-popolazzjoni. It-tort dejjem ta’ xi ħaddieħor. Issa, tort anke tal-anzjani li qed jgħixu aktar.

Il-housing mhux dritt

Il-Ħadd li għadda Joseph Muscat qalilna wkoll li l-Gvern daqshekk għamilha ta’ Christmas Father bil-housing. Ghax il-housing mhux xi dritt. Tajjeb wieħed ifakkar pero’ li parti kbira mill-problema tal-housing li sar għandu l-pajjiż hija proprju tort ta’ Joseph Muscat.

L-ewwelnett, fis-sitt snin li ilu fil-Gvern għadu ma lestiex unit wieħed ta’ akkomodazzjoni soċjali. Lanqas wieħed. Dan filwaqt li ħadem kemm felaħ biex art pubblika tal-poplu ta b’xejn lil min diġa’ għandu ħafna: il-ftehim tad-db, tal-Corinthia, tal-Università taparsi Amerikana, u l-Australia Hall lill-Partit Laburista innifsu.

It-tieni, il-problemi tal-akkomodazzjoni soċjali żdiedu primarjament minħabba l-importazzjoni ta’ ħaddiema barranin u ż-żieda bla pjan fil-popolazzjoni li qed jimbotta dan il-Gvern. Qalha l-Prim Ministru nnifsu. “Ħeqq jekk hemm mitt appartament, u issa flok hawn mitejn ruħ iridu jixtruhom hawn elf, bilfors il-prezz ser jogħla.”

Hekk hu, għandu r-raġun. Il-problema taż-żieda fil-prezz tal-proprjetà u tal-kera hija kkaġunata minn din is-sistema politika li qed jimbotta l-Gvern. U mhux għax qed jiġu ħaddiema li jifilħu jħallsu aktar, iżda għax hawn numru ta’ ħaddiema li appartament li s-soltu jinkera minn persuna waħda, lesti jaqsmuh bejniethom u jaqsmu l-kera bejn ħafna aktar nies.

Il-Partit Nazzjonalista jimpurtah

Huwa ċar li l-Prim Ministru m’għadux jimpurtah aktar minn kif ser jipprova jsolvi l-problemi li ħoloq hu stess. Ma niskantax. Hekk jew hekk, diġa’ qalilna li dalwaqt ser jitlaq. Mhux ser jerġa’ jaffaċċja test elettorali ieħor, u allura ma jimpurtahx aktar mill-popolarità tiegħu. U la ma jimpurtahx minn dik, ma jimpurtahx aktar mill-problemi li qed jaffaċċja l-poplu.

Għalhekk dawn id-dikjarazzjonijiet traskurati. Għalhekk dan il-paroli bl-addoċċ.

Mhux hekk il-Partit Nazzjonalista. Aħna jimpurtana. Aħna rridu nippreżentaw soluzzjonijiet għall-problemi li qed jaffaċċjaw in-nies. Aħna rridu naraw li kulħadd ikollu saqaf fuq rasu, għax iva, dak dritt essenzjali u fundamentali. Aħna rridu naraw li kulħadd jgħix ħajja diċenti, u mhux min jiġri ‘l quddiem u min jibqa’ lura. Aħna rridu naraw li nibnu ekonomija ibbażata fuq l-avvanz ta’ kull individwu, u mhux fuq l-avvanz globali tal-istatistika.

Aħna rridu soċjetà li jimpurtaha.

Dan l-artiklu deher bħala parti mir-rubrika Cyberspace fil-Mument tal-Ħadd 17 ta' Frar 2019