Partit propożittiv
Matul din
il-ġimgħa naħseb kulmin kien qed isegwi dak li qed jagħmel u jipproponi
l-Partit Nazzjonalista innota li dan il-Partit mhuwiex biss Oppożizzjoni li
titkellem fuq in-nuqqasijiet tal-Gvern, mhuwiex biss Oppożizzjoni tikkritika
dak li jkun qed isir ħażin, imma huwa wkoll Partit li joħroġ bl-ideat u
jipproponi dak li jista’ jsir aħjar b’riżq il-poplu Malti.
Nhar it-Tnejn li
għadda, permezz tal-Membru Parlamentari Ewropew Francis Zammit Dimech,
il-Kelliem għas-Saħħa Stephen Spiteri, u t-tabib Michael Asciak, il-Partit
Nazzjonalista għamel numru ta’ proposti biex tissaħħaħ il-ġlieda kontra
l-kanċer; marda li sfortunatament qed tikber fl-inċidenza tagħha u qed tolqot
ħafna nies. F’pajjiżna, jkollna elfejn każ kull sena u disa’ mitt mewt minħabba
din il-marda.
Għaldaqstant,
il-Partit Nazzjonalista fassal għoxrin proposta biex tissaħħaħ din il-ġlieda li
ser ikun qed jiddiskuti mal-istakeholders
fis-settur. Fost dawn il-proposti hemm li:
- Jsir population-based screening għal kanċer tal-prostata, li jolqot b’mod partikolari l-irġiel u li għad ma jsirx screening għalih fuq livell nazzjonali bħalma jsir fil-każ tal-kanċer tas-sider;
- Jsir screening ukoll għal tipi ta’ kanċer ieħor li żdied fl-inċidenza u li jista’ jitfejjaq jekk jinqabad kmieni, bħal fost l-oħrajn għal kanċer tal-għonq tal-utru;
- Jkun hemm taqsima speċjalizzata għall-kura tal-kanċer tas-sider. F’Malta jkollna tliet mija u ħamsin każ ġdid kull sena, iżda s-servizz provdut mhuwiex wieħed ħolistiku. Din it-taqsima għanda tirrefletti l-linji gwida mogħtija mill-European Society of Breast Cancer Specialists (EUSOMA);
- Jkun hemm
investiment akbar fir-riċerka u jinħarġu grants
għal riċerka anke wara l-livell tad-Dottorat fl-Università ta’ Malta, anke għaliex Malta fil-qasam tar-riċerka tinsab it-tielet
mill-aħħar;
- Jiżdied is-sapport psikoloġiku speċjalizzat għat-tfal li tolqothom din il-marda u għall-ġenituri tagħhom, kif ukoll għal tfal li jkollhom lil xi ħadd mill-ġenituri milqut minn din il-marda;
- Jintuża aktar fondi tal-Unjoni Ewropea għal attivitajiet u kampanji li jqajmu kuxjenza u li jgħin fil-prevenzjoni fil-komunitajiet;
- Jintlaħaq it-tir li l-mediċini kollha tal-kanċer ikunu b’xejn.
Proposti għat-trasferiment tal-qbiela
Il-Partit Nazzjonalista għamel ukoll numru ta’ proposti li jemendaw l-Avviż Legali li ressaq il-Gvern biex jiffaċilità t-trasferiment tal-qbiela ta’ bdiewa ġenwini. Dan biex tonqos l-ispekulazzjoni ta’ art agrikola u biex titnaqqas il-burokrazija minn settur li jinsab għaddej minn diffikultajiet kbar.
Il-mozzjoni li ressaq il-Partit Nazzjonalista fil-Parlament tipproponi li:
- Titneħħa r-restrizzjoni li art li magħha hemm bini ma tkunx tista’ tiġi trasferita, sabiex titnaqqas l-ispekulazzjoni u aktar art tibqa’ tinħadem;
- Jiżdiedu l-aħwa tal-kerrej u n-neputijiet tiegħu fil-lista ta’ persuni li lilhom tista’ tiġi trasferita l-qbiela;
- Jitneħħa l-obbligu li biex bidwi bona fide li ma jkunx qarib tal-kerrej tiġi trasferita qbiela f’ismu irid ikun bilfors reġistrat bħala full-time jew part-time, għalkemm jibqa’ l-obbligu li jkun reġistrat mad-Direttur tal-Agrikoltura;
- Tiddaħħal rata preferenzjali ta’ kera għal għaxar snin, minflok għal ħames snin, għal persuni li temmew l-istudji fl-agrikoltura fl-aħħar għaxar snin (minflok fl-aħħar ħames snin biss kif propona l-Gvern);
- Jiddaħħal dritt ta’ appell mid-deċiżjonijiet meħuda mill-Awtorità.
B’dawn
il-proposti tassew jiġu mgħejjuna l-bdiewa ġenwini, titnaqqas l-ispekulazzjoni
tal-art, u titnaqqas il-burokrazjia. Il-biedja għandna bżonn nindukrawha u
ngħinuha, mhux biss għal ġid tal-ambjent, iżda wkoll biex jibqa’ jkollna
prodott lokali u frisk.
Il-Partit
Nazzjonalista qed ikompli juri li mhuwiex biss Partit li jikxef in-nuqqasijiet
u l-ħażin tal-Gvern, imma qed joffri wkoll Gvern alternattiv li tassew
jimpurtah minn dak li jkun qed jesperjenza kull membru tas-soċjetà.
Dan l-artiklu deher bħala parti mir-rubrika Cyberspace fil-Mument tal-Ħadd 10 ta' Frar 2019
Comments
Post a Comment