Din il-ġimgħa ġie
fi tmiemu l-Kunsill Ġenerali amministrattiv tal-Partit Nazzjonalista. Kunsill
Ġenerali bit-tema “Flimkien għal Pajjiżna”, li ra numru rekord ta’ parteċipanti
u kelliema, fosthom numru kbir ta’ żgħażagħ, li wħud minnhom huma anke kandidati
ġodda għall-elezzjonijiet tal-Kunsilli Lokali.
L-aħħar sessjoni
ta’ nhar l-Erbgħa li għaddew ġiet konkluża bid-diskors tal-Kap tal-Partit
Adrian Delia, diskors li fih il-Kap kellu l-opportunità jelenka l-prioritajiet
politiċi li qed jaħdem fuqhom il-Partit Nazzjonalista, u l-viżjoni tagħna ‘l
quddiem.
U din hija
importanti ħafna. Għax il-mistoqsija li dejjem irridu nistaqsu lilna nfusna
hija “għaliex in-nies għandhom jivvutaw lill-Partit Nazzjonalista”? In-nies
mhux ħa jivvutawlna għax konna mmexxu tajjeb fil-passat. In-nies mhux ħa
jivvutawlna għax nikxfu l-ħażin ta’ dan il-Gvern. In-nies mhux ħa jivvutawlna
għax il-Gvern Laburista huwa l-aktar Gvern korrott fl-istorja ta’ Malta.
In-nies jivvutawlna jekk jaraw fina Partit b’viżjoni, lest li jmexxi u li
jista’ jagħti soluzzjonijiet għall-problemi kbar li ħoloq il-mudell ekonomiku
li mbotta Joseph Muscat.
U dan hu proprju
dak li t-tmexxija tal-Partit, primarjament il-Kap Adrian Delia, qegħdin
nippruvaw inwasslu.
Id-diskors
tal-Kap iffoka fuq tliet temi prinċipali: id-demokrazija, il-ġustizzja soċjali u
ż-żgħażagħ.
Fuq
id-demokrazija, inkluż is-saltna tad-dritt, diġa’ tkellimna ħafna. Ma
tkellimniex biss aħna, tkellmet il-Kummissjoni Venezja, tkellmet il-Kummissjoni
Ewopea, tkellmet id-delegazzjoni tal-Parlament Ewropew, u tkellmu għal diversi
drabi l-Awditur Ġenerali ul-Ombudsman, riċentament anke fuq il-promozzjonijiet
li saru fl-Armata u kif dawn huma ta’ theddida għad-demokrazija. Il-mod kif dan
il-Gvern ħataf il-poter b’mod assolut f’idejh u ma ħalliex spazju biex
jiffunzjonaw kif suppost l-istituzzjonijiet mhux biss qed ikisser il-pedamenti
tad-demokrazija u tal-ġustizzja, imma qed jagħmel ħsara kbira lir-reputazzjoni
ta’ Malta. Dan ikkonfermah ukoll is-CEO tal-HSBC, li qal kif dan huwa l-ikbar
problema li qed jaffaċċja s-settur tas-servizzi finanzjarji f’Malta.
Il-politika ta’
dan il-Gvern turi wkoll li tilef ir-ruħ soċjali tiegħu, u nesa għal kollox
il-ġustizzja soċjali. Ħoloq mudell ekonomiku fejn wassal għal klassi ta’ faqar
ġdid, dak li l-Kap sejjaħlu the educated
poor. Qabel kont tistudja, tistinka, u taħdem għax kont motivat li jekk
taħdem tirnexxi, tista’ tasal, tista’ tkampa. Illum inħolqot soċjetà fejn
lanqas il-professjonisti, għalliema, infermiera, social workers żgħażagħ, li t-tnejn ikunu jaħdmu, ma għadhom
jaffordjaw ikollhom saqaf tagħhom fuq rashom. Dan meta sa inqas minn għaxar
snin ilu konna mmexxu politika fejn kulħadd kien ikun inċentivat isir sid ta’
daru. X’differenza!
U hawn qed inkunu
ċari. B’Partit Nazzjonalista, kulħadd għandu garanzija li jkollu saqaf fuq
rasu. Għax dak hu dritt, mhux lussu. Bħalma hu dritt li kull wild ikollu
edukazzjoni diċenti, bl-aqwa riżorsi, u mhux fil-kontejners. Bħalma hu dritt li
kull ħaddiem ikollu paga diċenti, u mhux jgħix fil-prekarjat għax għandna Gvern
taċ-cheap labour. Bħalma hu
dritt li kull pensjonant li għamel għomru u żmienu jħallas il-bolla jkollu
pensjoni, u mhux ikun mhedded li rridu nżidu l-ħaddiema barranin biex jeħodha.
U dan mhux biss
għalina, iżda għal uliedna. Għal pajjiż li ser ikunu qed jgħixu fih.U għalhekk
li l-Partit Nazzjonalista qed jerġa’ jsir partit żagħżugħ, fejn iż-żgħażagħ
ikunu involuti fl-ogħla postijiet tat-tmexxija u tat-tfassil tal-politika
tal-Partit. Għax ma rridux iktar pajjiż fejn iż-żgħażagħ tagħna jaqtgħu qalbhom
u jemigraw biex jlħqu l-potenzjal tagħhom. Irridu pajjiż fejn iż-żgħażagħ
jilħqu l-aspirazzjonijiet u l-potenzjal tagħhom hawn, f’pajjiżhom, f’pajjiżna.
F’pajjiż nadif, f’pajjiż ġust, f’pajjiż meritokratiku.
Dan nemmnuh u
rriduh ilkoll. U għalhekk qed naħdmu flimkien. Għalhekk qed nibnu politika
ġdida flimkien. Għalina, għal Partit tagħna, imma fuq kollox għal uliedna u
għal pajjiżna.
Dan l-artiklu deher fir-rubrika Cyberspace fil-ġurnal il-Mument ta' nhar il-Ħadd 3 ta' Marzu 2019
Comments
Post a Comment