Rapport
ippubblikat din il-ġimgħa mill-Aġenżija Ewropea dwar l-Ambjent, Malta għandha
fost l-agħar livelli ta’ tniġġis fl-arja fl-Unjoni Ewropea. Malta hija r-raba’
l-iktar pajjiż bl-ogħla livell ta’ partikoli ta’ tniġġis fl-arja. L-uniċi
pajjiżi li għandhom medja ta’ tniġġis tal-arja aktar minn tagħna huma
l-Bulgarija, il-Polonja u l-Greċja. Però l-qagħda ta’ Malta hija
agħar għax f’dawn il-pajjiżi, jekk wieħed irid jieħu nifs mit-tniġġis fl-arja faċilment
joħroġ il-barra mill-ibliet u jmur fil-kampanja jew fil-muntanji. F’Malta anke
jekk tmur f’ambjent rurali, il-pajjiż tant hu żgħir li t-tniġġis jibqa’
preżenti, u jekk verament trid tistrieħ mit-tniġġis trid ta’ bilfors issiefer.
Li jfisser li din hija xi ħaġa aċċessibbli biss għal min għandu ċertu qliegħ.
Jekk wieħed jiftakar li fl-istatistika dwar il-faqar ippubblikata ftit
tal-ġranet ilu terz tal-poplu ma jaffordjax jieħu ġimgħa btala darba fis-sena,
wieħed jista’ faċilment jikkonkludi li l-fatt li nieħdu ħsieb l-qagħda tal-arja
u tal-ambjent tagħna fiha wkoll element ta’ ġustizzja soċjali għan-nies li ma
jistgħux jistrieħu billi jmorru barra l-pajjiż.
It-tniġġis
fl-arja jikkawża mhux biss ħafna mard respiratorju, iżda wkoll imwiet. Skont
dan ir-rapport, 400,000 Ewropew fis-sena jmutu b’mod prematur minħabba dan
it-tniġġis. Kull sena f’Malta jmutu 600 persuna minħabba dan it-tniġġis,
id-doppju tat-300 li kien maħsub qabel.
Hija
responsabbilità ewlenija tal-Gvern li jara li l-kwalità tal-arja ma tkomplix tkun ta’ theddida għal
poplu. L-istatistika turi li fiċ-ċentru ta’ Malta, partikolarment f’Ħ’Attard,
il-kwalità tal-arja hija agħar minn Beijing. Fin-naħa t’isfel ta’ Malta, hija
20 darba agħar mil-livelli aċċettabbli għas-saħħa tal-bniedem.
Fl-istess ħin, is-sena li għaddiet il-Ministeru tal-Ambjent nefaq €700,000
f’reklamar u PR biex jipprova jgħidilna kemm dan il-Gvern tejjeb il-kwalità
tal-arja. L-istess kien għamel il-Ministeru tal-Enerġija meta saret il-powerstation tal-gass u nġieb it-tanker
tal-korruzzjoni. Minflok infaqna l-flus f’investimenti biex intejbu l-kwalità
tal-arja, ipprefera li jintefqu fil-marketing.
 |
| Paroli si, fatti no |
 |
| Flus moħlija fil-Marketing flok fuq saħħtek |
Sadattant, il-Gvern kompla bil-politika tiegħu ta’ tkabbir
fil-popolazzjoni. Tkabbir li jfisser aktar nies, aktar karozzi, aktar traffiku,
u allura aktar tniġġis fl-arja. U meta l-Prim Ministru ssemmilu li pajjiżna
għandu bżonn jagħmel pjan fit-tul biex inaqqas dawn l-effetti, jgħidlek li ma
jaqbel xejn mal-ippjanar fit-tul. Mhux bilfors, hu xi tridu jippjana. Li ried
ħadu, u issa lest biex iparpar u jħalli l-problemi li ħoloq għal min jiġi
warajh.
 |
| Popolazzjoni ikbar mingħajr pjanar: aktar traffiku u tniġġis |
Mewt oħra f’Kordin
Priġunier ieħor instab mejjet f’Kordin. Dik li suppost hi faċilità
korrettiva, saret post fejn il-priġunieri jmutu, fejn il-priġunieri jsiru aktar
dipendenti fuq id-droga, u fejn il-priġunieri issa ġie konfermat mill-Qorti Ewropea
għad-Drittijiet tal-Bniedem li jiġu trattati b’mod degradanti u inuman, u
saħansitra ordnat kumpens fil-każ ta’ priġunier li fetaħ kawża quddiemha.
Filwaqt li trid issir ġustizzja, huwa biżżejjed li bniedem iħallas għal
għemilu b’detenzjoni u bit-teħid tal-libertà tiegħu. Il-kastig m’għandux imur
oltre’ minn hekk. U l-pajjiż irid jara li l-bniedem qiegħed jiġi wkoll
riabilitat biex jerġa’ joħroġ lura fis-soċjetà.
Quddiem dawn il-każi serji ta’ mwiet, ta’ droga, u ta’ trattament inuman,
hemm bżonn li mhux biss isiru investigazzjonijiet u jsiru pubbliċi, iżda li
tintrefa’ wkoll responsabbilità politika minn min hu fl-aħħar mill-aħħar
responsabbli għad-deċiżjonijiet li ttieħdu.
Dan l-artiklu deher fir-rubrika Cyberspace fil-ġurnal il-Mument ta' nhar il-Ħadd 17 ta' Marzu 2019
Comments
Post a Comment