Dil-ġimgħa ġie
żvelat x’hemm fid-draft tar-rappot tal-Moneyval, kif inhu magħruf fil-qosor
il-Kumitat ta’ Esperti dwar l-Evalwazzjoni ta’ Miżuri Kontra l-Ħasil tal-Flus u
l-Iffinanzjar tat-Terroriżmu, kumitat permanenti fi ħdan il-Kunsill tal-Ewropa.
Dan il-Kumitat
jittestja l-pajjiżi appuntu dwar il-miżuri li jimplimenta biex jiġġieled
il-ħasil tal-flus u l-użu ta’ dawn il-flus biex jiġi ffinanzjat it-terroriżmu.
Jidher li fit-test li dan il-Kumitat għamel fuq Malta, Malta falliet.
M’għaddietx.
Huwa veru li dan
ir-rapport ikun konkluż biss f’Lulju, u allura Malta baqagħlha ftit xhur ċans
biex tirranġa l-affarijiet u tirranġa l-marka tagħha. Però huwa veru wkoll li fil-preżent, ma ngħaddux. U ma niskantax. Dan ilna
ngħiduh għal żmien twil. Għax kif jista’ jkun tiġġieled il-ħasil tal-flus meta
twaqqaf l-investigazzjonijiet għax ikunu jinvolvu Ministru u c-Chief-of-Staff
tiegħu? Kif jista’ jkun tiġġieled il-ħasil ta’ flus meta int l-unika Gvern
b’nies involuti fil-Panama Papers li ma tressaq ħadd il-Qorti? Kif jista’ jkun
qed tiġġieled il-ħasil ta’ flus meta tiġi ppubblikata evidenza ċara li kien
hemm tixħim u arranġamenti għal ħlas ta’ €5,000 kuljum f’but nies mill-Gvern
minn kuntratt massiv bħalma kien dak tal-powerstation?
U kif jista’ jkun
tbellagħhielna li hawn miżuri effettivi ta’ due-diligence,
meta nsiru nafu li l-passaport tagħna inbiegħ lil nies suspettużi, li mhu
suppost qatt li ngħataw ċittadinanza Maltija? Kif jista’ jkun nemmnu li Malta
qed tgħin fil-ġlieda kontra t-terroriżmu, meta skont ir-rapport tal-Awditur
Ġenerali tajna viżas lil mijiet ta’ Alġerini li l-Pulizija taw rakkomandazzjoni
biex ma tingħatalhomx, għax huma ta’ theddida għas-sigurtà tal-Ewropa?
Nhar it-Tnejn
stess, meta ġie żvelat dan ir-rapport tal-Moneyval, il-blogger Amerikan Kenneth
Rijock, li jinvestiga ħafna l-kriminalità finanzjarja, ikkummenta dwar l-għoti ta’ liċenzja lil Pilatus Bank. Jgħid
li l-investigaturi Amerikani kienu ilhom jinvestigawh mill-2011. Kellhom warrant biex ifittxu fl-emails tiegħu,
mill-2014. Jistaqsi kif qatt jista’ jkun li l-Gvern u l-Awtoritajiet Maltin
għamlu due-diligence kif suppost meta
dawn xorta waħda tawh liċenzja. Jgħid li “kwalunkwe tfittxija ta’ due-diligence kif suppost kienet issib
ir-rabta li kellu Ali Sadr Hasheminejad mal-Iran, li kienet taħt sanzjonijiet.”
Jistaqsi wkoll jekk din il-liċenzja ingħatatx wara “l-arti ta’ ħlas ta’
tixħim”, għax jgħid li “ebda direttur ta’ compliance li jiswa ismu ma kien qatt
japprova din il-liċenzja...xi ħaġa korrot żgur li ġrat biex din inħarġet.”
Sadattant, ħadd mill-Gvern ma jerfa’ r-responsabbilità. Lanqas il-Ministru
Edward Scicluna, li huwa l-Ministru li taħtu saret din il-ħsara kollha
lir-reputazzjoni ta’ Malta, fost l-oħrajn minħabba n-nuqqas ta’ azzjoni tiegħu,
mhu lest jerfa’ responsabbilità politika għal dan il-falliment. Ċertament mhux
ħa jagħmlu dan Joseph Muscat u Konrad Mizzi, li responsabbilità politika lanqas
biss jafu fejn toqgħod. Ara l-kontijiet tal-bank u l-uffiċċji tan-Nexia BT,
dawk jafu fejn huma. Anzi, biex ma jevitaw l-iskariġġ tawhom uffiċċju
f’Kastillja stess.
Tweġġa’ meta
pajjiżek jibda jissemma’ biss fil-ħażin. Tweġġa’ meta tiltaqa’ ma’ barranin,
jew tmur barra minn Malta, u tisma’ biss kummenti dwar bejgħ ta’ passaporti,
dwar ħasil ta’ flus, dwar Ministri fil-Panama Papers, dwar Mafja. Tweġġa’ meta
kull test li jiffaċċja pajjiżek jispiċċa jew jitkaxkar fih, bħalma għamel
fir-rapport tat-Transparency International, jew ma jgħaddix, bħalma għamel
fir-rapport tal-Kummissjoni Venezja u issa fir-rapport tal-Moneyval.
Iżda tweġġa’
aktar meta tifhem li dan kollu stajna nevitawh li kieku fit-tmexxija għandna
politiċi u Gvern responsabbli, li jġibu isem Malta u mhux buthom l-ewwel u
qabel kollox.
Comments
Post a Comment