Il-Ħamis li
għadda l-Eurostat ippublikat statistika dwar iż-żieda tal-pagi u s-salarji
fil-pajjiżi kollha tal-Unjoni Ewropea. L-istatistika tikkonferma li Malta kien
hawn l-inqas żieda fil-pagi fl-Unjoni Ewropea kollha, u tikkonferma wkoll li
l-pagi f’Malta għadhom inqas mill-medja tal-Unjoni Ewropea.
Din tikkonferma
wkoll statistika oħra tal-perjodu preċedenti li għall-ewwel darba kienet sabet
li l-paga medja f’Malta kienet naqset minflok żdiedet. Dan filwaqt li qed naraw
li l-ħajja qed tkompli togħla, bl-aktar affarijiet essenzjali bħall-ikel u
l-mediċini jkunu l-iżjed milquta mill-inflazzjoni. Anzi, statistika Ewropea
tikkonferma li Malta esperjenzat l-akbar żieda fl-għoli tal-ħajja mill-2017 ‘l
hawn.
Dan mhuwiex
riżultat li ġie b’kumbinazzjoni. Dan huwa l-frott tal-mudell ekonomiku li
għażel li jħaddem dan il-Gvern. Mudell ekonomiku fejn qed inżidu l-Prodott
Gross Domestiku nazzjonali ta’ pajjiżna u nkabbru l-ekonomija billi nżidu
l-popolazzjoni mingħajr ebda pjan, billi nimpurtaw ic-cheap labour. Dan qed iwassal biex id-domanda għal affarijiet
essenzjali u għall-housing tikber,
iżżid il-prezzijiet, tgħolli l-ħajja, u fl-istess ħin iżżomm il-pagi baxxi għax
iżżid id-disponibbilità ta’ ħaddiema li lesti
jaħdmu b’pagi baxxi. Dan inaqqas is-saħħa tal-ħaddiem milli jinnegozzja pagi
aħjar u jnaqqas l-effetività tal-unions.
Ir-riżultat? Il-pagi jibqgħu baxxi, u l-ħajja togħla. Morsa doppja għal
ħaddiem żgħir u medju, li issa qed taffetwa anke l-middle class u l-komunità kummerċjali. Tant li illum vera li Joseph
Muscat irnexxielu joħloq middle class ġdida:
dik tal-working poor. Dik
tal-ħaddiema, ġieli anke professjonisti, li ma jaffordjawx ikollhom saqaf fuq
rashom. Li ma jaffordjawx la jikru u lanqas jixtru d-dar tagħhom.
U ma’ dawn inżidu l-anzjani li bil-pensjoni tagħhom bilkemm ilaħħqu jaslu
sal-aħħar tax-xahar u li biex jixtru l-mediċini tagħhom iridu joqogħdu attenti
x’ikel jixtru jew jiċċaħħdu minn ċertu ikel sustanzjuż.
Dak li jiġri meta l-unika mod kif titkabbar l-ekonomija jkun żieda
fil-popolazzjoni flok pjan ta’ titjib ekonomiku biex l-ekonomija tikber
b’xogħol aħjar u żidiet il-pagi. Dak li jiġri meta tipprova tgħaġġel biex
tidher sabiħ, imbagħad iġġib l-iskuża li issa mal-laħma rridu nibilgħu wkoll
l-għadma.
Safrattant, għaddejjin bl-iktar Gvern korrott fl-istorja ta’ pajjiżna.
Korruzzjoni istituzzjonalizzata li huwa stmat li qed tiswa lil pajjiżna aktar
minn €725 miljun. Miljuni li faċilment jistgħu jmorru biex itaffu mill-piżijiet
li qed jaffaċċjaw il-ħaddiema. Li jistgħu jintużaw biex jgħinu lill-koppji
żgħażagħ, u anke żgħażagħ li jixtiequ jmorru jgħixu għal rashom, biex
jakkwistaw l-ewwel proprjetà tagħhom. Li jistgħu jintużaw biex il-pensjonanti
jkollhom aċċess għall-mediċini b’xejn.
Minflok, qed imorru biex ixaħħmu u jħaxxnu bwiet dawk li diġa’ għandhom
ħafna. U huma jieklu l-laħma, waqt li aħna nibqgħu bl-għadma.
Dan l-artiklu deher fil-Mument tal-Ħadd 14 ta' April 2019
Comments
Post a Comment