Ftit tal-ġranet
ilu, tellajt artiklu fuq dan il-blog (misluf mir-rubrika tiegħi "Cyberspace" f' In-Nazzjon), fejn pruvajt nispjega b’mod sempliċi kif
is-sistema li qed jaħdmu biha l-ARMS bil-kontijiet kull xahrejn qed twassal
biex in-nies iħallsu iktar f'kontijiet tad-dawl u l-ilma.
Matul il-ġimgħa
xerridt dan l-artiklu fil-midja soċjali, u numru kbir ta’ persuni qassmuh ma’
sħabhom, irrispondew u bagħtuli l-kontijiet tagħhom. Oħrajn, f’dak li
deher bħala risposta kordinata u organizzata, daħlu joffendu, jgħajjru, u
jippruvaw igiddbu l-matematika u l-fatti pruvati.
Wieħed
partikolari, li hu magħruf simpatizzant tal-Partit Laburista fid-distrett
tiegħi, daħal jikkummenta u jisfidana li sakemm ma nippublikawx dawn
il-kontijiet aħna paroli biss, “bla bla bla u ħabi” u ma nistgħux niġu emmnuti.
Ovvjament spjegajtlu li l-kontijiet tan-nies ma nistgħux nippubblikawhom
minħabba l-protezzjoni tad-data, u minflok offrejtlu jurini l-kontijiet tiegħu
u ngħid lilu hu kemm qed jinsteraq.
Kien pront u bagħatli li hu fl-aħħar sena
ikkonsma 5,348 units ta’ dawl, 95 units ta’ ilma, €65 tal-kera tal-arloġġ, u
l-kont kulma ġieħ kien ta’ €932. Bħal li kieku dan kien prezz ġust u irħis.
Is-sinjur baqa’ ma nfurmanix kemm qegħdin nies id-dar, u allura għal dnubieti
ħdimtlu kemm suppost ġieħ il-kont kemm li kieku qegħdin tlieta min-nies, u kemm
li kieku qegħdin erbgħa (għax mill-ammonti ta’ użu tal-ilma jidher li qegħdin
aktar minn tnejn).
U ħareġ biċ-ċar
li s-sinjur, li tgħidx kemm ftaħar li l-Gvern raħħaslu l-kont u li qalli li
m’għandix xi ngħidlu, qiegħed jinsteraq waħda u sew. Għax jekk qegħdin tlieta
min-nies id-dar, il-kont suppost ġieħ €841.64, waqt li jekk qegħdin erbgħa,
il-kont suppost ġieh €698.14 (id-differenza hija li jekk qegħdin tlieta,
bl-ammont ta’ units li uża’ ma kwalifikax għall-eko-riduzzjoni).
Is-sinjur ma
rrispondinix iżjed, u baqa’ ma qallix jekk hux qegħdin tlieta, u allura
insteraq €91, jew hux qegħdin erbgħa, u allura insteraq €234. Imma probabli
fl-aħħar fehem illi l-wegħdi u l-propoganda li mlielu għajnu biha l-Partit
tiegħu kien biss qerq. L-istedina tiegħi lejh tibqa’ miftuħa biex jekk irid,
iġiblna l-kont tiegħu wkoll u niġġieldu għalih ukoll, biex jieħu lura dak li hu
tiegħu.
Comments
Post a Comment